Dilla University

Articles

ዲላ ዩኒቨርሲቲ በሁለተኛ ደረጃ ትምህርት ቤቶች የሳይንስ ትምህርት አሠጣጥ ላይ የሚስተዋለውን ችግር ለመቅረፍ እየሠራ ነው

ዲላ ዩኒቨርሲቲ በሁለተኛ ደረጃ ትምህርት ቤቶች የሳይንስ ትምህርት አሠጣጥ ላይ የሚስተዋለውን ችግር ለመቅረፍ እየሠራ ነው 


ዲዩ፤ የካቲት 19 ቀን 2011 ዓ.ም (ህዝብ ግንኙነት) የተፈጥሮና ቀመር ሳንስ ኮሌጅ ከማህበረሰብ አገልግሎትና አጋርነት ዳይሬክቶት ጋር በመተባበር ከጌዴኦ ዞን 2ኛ ደረጃ ትምህርት ቤቶች ለተውጣጡ የሳይንስ መምህራን የቤተ ሙከራ ዕውቀትና ክህሎትን ለማሻሻል የሚያግዝ ስልጠና ለአምስት ቀናት ሰጠ፡፡
ዕውቀት የሚሻሻልና የሚያድግ በመሆኑ መምህራን ለተማሪዎቻቸው የተሻለ ዕውቀት ለማጨስበጥ ሁልጊዜ መማር፣ ማንበብና ክህሎታቸውን ማዳበር ይጠበቅባቸዋል፡፡ 
መምህራን በሥራ ላይ ስልጠና እራሳቸውን ማብቃት ካልቻሉ ከዘመኑ ጋር አብሮ ለማደግና ፍሬያማ ትውልድ ለመቅረፅ ይቸገራሉ፡፡ መምህራን በተሰማሩበት የትምህርት መስክ በቂ ዕውቀት ሊኖራቸውና የተሻለ ግንዛቤ በማስጨበት ተወዳዳሪ፣ አምራችና ምክንያታዊ ትውልድ ማፍራት ይጠበቅባቸዋል፡፡
በሀገራችን በተለይ በሳይንስ ትምህርቶች የሚስተዋለው ክፍተት የሳይንስ ኪት (የቤተ ሙከራ ቁሳቁስ) እጥረት ቢሆንም በየትምህርት ቤቶቹ ያሉትን ቤተ ሙከራዎች በአግባቡ የሚጠቀሙት መምህራን ቁጥር አናሳ መሆኑን ከዲላ ሁለተኛና መሠናዶ ትምህርት ቤት የመጡት መምህር ነፃነት ወንድምአገኝ ተናግረዋል፡፡
መምህራን በየጊዜው እራሳቸውን ማብቃት ካልቻሉ ዘመኑን የሚመጥን ዕውቀት ለተማሪዎቻቸው ሊያስጨብጡ አይችሉም ያሉት አስተያየት ሰጭው አዳዲስ ዕውቀት ለመቅሰም ግኝቶችን ለመረዳት የሥራ ላይ ስልጠና መዘጋጀቱ ጠቃሚ ነው ብለዋል፡፡ 
የምናስተምረውን የንድፈ-ሃሳብ ትምህርት በተግባር በማስደገፍ ረገድ ውስንነት አለብን ያሉት መምህር ነፃነት የግንዛቤ ማነስ፣ የዕውቀትና ክህሎት ውስንነትን በምክንያትነት ይጠቅሳሉ፡፡ በዚህም በአንደኛና ሁለተኛ ደረጃ ትምህርት ቤቶች በሚፈጠር ክፍተት ሀገር ተረካቢና ተመራማሪ ብቁ ዜጎችን በማፍራት የከፍተኛ ትምህርት ተቋማት ይቸገራሉ ብለዋል፡፡
ያገኙት ስልጠና የነበረባቸውን ክፍተት እንዲረዱ እንዳስቻላቸው የገለፁት ሌላዋ አስተያየት ሰጭ ደግሞ የቆፌ 2ኛ ደረጃ ትምህርት ቤት መምህርት ታመነች ለማ ናቸው፡፡
ሁሉም ሰልጣኞች ወደ ትምህርት ቤቶቻቸው ሲመለሱ ቤተ ሙከራዎቻቸውን ወደ ሥራ ለማስገባትና በተግባር የተደረገ ትምህርት በማስተማር የድርሻቸውን እንደሚወጡ ቃል ገብተዋል፡፡
ስልጠናውን ከሰጡት መካከል በዩኒቨርሲቲው የተፈጥሮና ቀመር ሳይንስ ኮሌጅ የፊዚክስ ትምህርት ክፍል መምህር የሆኑት ኪሩቤል ካሳሁን በበኩላቸው በሳይንስ ትምህርቶች የተማሪዎችን ብቃት ለማሳደግ የመምህራንን ክህሎት ማሻሻል ትኩረት ሊሰጠው እንደሚገባ ተናግረዋል፡፡ 
አክለውም በአንደኛና ሁለተኛ ደረጃ ትምህርት ቤቶች በተግባር የተደገፈ ትምህርት አሰጣጡ ውስንነት አለበት፣ ችግሩን በመፍታት በሳይንሱ ዘርፍ የሚጠበቀው ውጤት ማስመዝገብ እንዲቻል በጌዴኦ ዞን ሁሉም የሁለተኛ ትምህርት ቤቶች ቀጣይነት ያለው ድጋፍ እናደርጋለን ብለዋል፡፡
በስልጠናው የሁለተኛ ደረጃ ትምህርት ቤቶች ሳይንስ ቤተ-ሙከራ መምህራንን ዕውቀትና ክህሎት ለማሻሻል ታልሞ የፊዚክስና ኬሚስትሪ መምህራን ተሳታፊ ሆነዋል፡፡